Vangaveltur

Skrifaði grein á Selluna í dag. Kíkið endilega á það.

Ekki mjög dugleg að uppfæra þessa dagana. En aftur á móti er Solla búin að uppfæra sína síðu. Nýjar myndir frá Bretlandsferðinni um páskana og nýr pistill í dagbókinni. Leiter.

Úpps - bloggfall í heila viku. Ekki alveg nógu gott. Mikið að gera hjá heimavinnandi húsmóðurinni. Búið að taka alla vikuna að þrífa skítaholuna. Gengur ekki lengur undir því nafni, er núna hin skínandi hreina hola. Allt tekið í gegn hátt og lágt, gekk svo langt að þvo og strauja gluggatjöldin og ég veit ekki hvað og hvað...

Gaf mér þó tíma til að horfa á hið konunglega brúðkaup á föstudaginn. Hin konunglegu tár Friðriks þegar brúður hans gekk inn kirkjugólfið voru án efa hápunktur vikunnar hjá mér. Umfjöllun um fjölmiðlafrumvarp, allt tal um vanhæfni forsetans og stór orð um persónu forsætisráðherra blikna í samanburði. Er sammála síðustu færslu Obbu. Hef horft á öll konungleg brúðkaup sem hægt hefur verið að komast í á undanförnum áratug. Verð að viðurkenna að ég er voða svag fyrir slíku.

Ég fór ekki í Eurovision partý í gærkvöldi eins og hálf þjóðin. Við hjónin pössuðum Ragnheiði, litlu frænku okkar svo foreldrar hennar kæmust á djammið. Hún svaf hérna hjá okkur í fyrsta sinn. Gekk bara voða vel, ekki hægt að segja annað. Nema að Solla virðist vera svo mikill skelfir að aumingja Ragnheiður fór alltaf að gráta þegar Solla var að reyna að leika við hana. Við horfðum nú samt á keppnina og fannst okkur Jónsi standa sig eins og hetja. Ég verð nú að segja það að mér finnst þetta lag bara fínt. Textinn er þó ekki neitt til að hrópa húrra fyrir, en lagið sjálft alveg hreint ágætt. Ruslana var líka vel að sigrinum komin. Víkingaþemað fór vel í Evrópu, við hefðum nú átt að láta okkur detta slíkt í hug fyrir löngu...

Jæja, sagan endalausa hefur fengið endir. Prófum er lokið, með allra sæmilegasta árangri. Ég er því orðin lögfræðingur ! Eða réttara sagt mjög svo ofmenntuð heimavinnandi húsmóðir, því ekki er ég búin að ráða mig í vinnu. Verkefni næstu viku verða því þrif, þrif og aftur þrif. Skítaholan sem við búum í og skítakagginn sem við keyrum á þurfa mjög nauðsynlega á allsherjar yfirhalningu að halda. Það er því verkefni næstu viku. Ásamt því að finna vinnu.

Lögfræðingurinn sem ræstitæknir. Se moi.

Áfram heldur sagan endalausa. Er ennþá í prófum. Fór í samanburðarlögfræðina í gær og dró Kínverskan rétt. Við Páll ræddum því fram og aftur um réttarþróunina í Kína, allt frá dögum Konfúsíusar. Gekk svona bærilega. Var reyndar ein af þeim spurningum sem ég var búin að óska að ég fengi ekki. Gat þó auðvitað fabúlerað eitthvað um li og fa og hvað Kína er stórt og strjálbýlt ríki.

Næst er það Starfsmannaréttur á föstudaginn. Það próf gildir reyndar bara 40% þar sem ég er búin að gera tvö verkefni sem giltu 30% hvort. Fékk ágæta einkunn fyrir þau og er því í ágætis málum. Nema hvað ég er ekki búin að lesa neitt í efninu, fyrir utan það sem ég las til að leysa úr verkefnunum. Næstu tveir dagar fara því í þann lestur.

Annars er ég búin að vera að renna yfir álit UA um skipun í stöðu Hæstaréttardómara. Alveg hreint mögnuð lesning. Í öllum siðuðum ríkjum yrði viðkomandi ráðherra að segja af sér med det samme. Sé ekki alveg fyrir mér að það gerist núna. E.t.v. ætti maður að fara og gefa honum banana. Af ávöxtunum skuluð þið þekkja þá.